كافي يا رحال كافي -لشاعر جابر الكاظمي

size=18]بسم الله الرحمن الرحيم

اللهم صل على محمد وال محمد
.. كافي يا رحال كافي ..




كافي يا رحال كافي
عوّد إلديرة هلك روح إرجع إلنبعك الصافي
او على اشفاف الغيم إطبگ شفتك وإشرب عوافي
يلي عينك خاوت اعيون الثرية او غيرك اعلى الكاس غافي
كافي مو ملت بعد من جدمك ادروب المنافي
او هذه آثارك حلم مذبوح بسيوف التجافي
وإنت بين الآه والأحاه تتمرجح على أحبال القوافي
شگد شگيت او ذبلت زهرة حياتك للصديج إلما يوافي
كافي يا رحال كافي
يا أشف من ريحة النسرين لو نامت على خدود الچفافي
ويا صلابة عود ظامي فطمته انهود الفيافي
كافي تترجى النشر من بين ذرات السوافي
كافي يا رحال كافي

كافي يل ما صح نصيح إلروحك الطيبة نصحها
او هذه طاحونة عذابك ذرت ابعينك ملحها
خمسة وثلاثين عام ابكل نزحها او كل گبحها
ساهرتها إليالي عتمها البخل ما جادت اعليك ابصبحها
اسهرت ترتاچ اعلى رمحك والشمس ما بين إلعينك رمحها
يلي گلبك صار للرميات شاخصها او شبحها
هوه هم يوم الفرح مر بيك حتى اتشارك الوادم فرحها
هوه جرحك هم لگيت ادواه حتى اتحير بالناس او جرحها
كافي يا رحال شد الراحلة او عمر جنحها
إرجع إلديرة هلك يا عمد ديرتها او صرحها
هب لعلى او عسى يصح لجروح گلبك من يشافي
إرجع إرجع حتى لو تمشي على الجمرات حافي
إرجع إرجع كافي يا رحال كافي

لا غرابة لو تلاطم سيل غيظك لا غرابة
يلي روحك ياسمينة اتفوح بالحب والصبابة
او لا غرابة من تحن روح الغريب ابغربته او يذكر أحبابه
يا أخو الترحال هذه ديرتك فتحت صدرها ابكل رحابة
او فرق ما بين الرمل من يخدع الظامي ابسرابه
او بين غيث إليروي چبد الگاع من عين السحابة
وأرد أگلك لا تأمن دنيتك ما إلها خوان او صحابة
دنيتك سن ذيب من تضحك چذب تربات غابة
اشلون إلها عيون وكحة أوكح او أصلف من اعيون الرقابة
خلها يا رحال خليها ابهواها الدنيا ما إلها گرابة
ابدال ما تعتب عليها غني موال او عتابة
غني غني ابلايه ناي الناي بين اضلوعك او گلبك ربابة
للوطن للآه للحب غني للشوگ او عذابه
يلي طورك من تغني لعلة المدنف يعافي
او لو تغني لي اعلى مد سچة حياتي ما أمل صوتك الدافي
وما أگلك چلمة إلما ضايگ اهموم المنافي
ولا أگلك كافي كافي
كافي يا رحال كافي



لشاعر الاديب / جابر الكاظمي